Vezir Haziraj, i cili dyshohet se mbrëmjen e së premtes plagosi me armë zjarri një person në fshatin Orroberdë të Istogut, është prononcuar përmes një videoje të publikuar në TikTok, derisa vazhdon të jetë në arrati.
Haziraj, i cili ishte liruar nga burgu dhe më herët kishte shprehur publikisht pakënaqësitë e tij lidhur me dënimin, në videon e fundit ka folur për rastin e tij të kaluar dhe pretendimet për, siç thotë ai, mungesë drejtësie.
“Pse me u dorëzu unë, kur Gani Gecit ia kanë bo vetëmbrojtje, aty dy vjet e gjysmë burg i ka mbajt për vrasje, a unë plagës vetëmbrojtje në shtëpi teme, mu 5 vjet mi jepni burg. Kur nuk ka drejtësi, unë e kom trunin tem, vazhdoj në atë temën time dhe nuk mundet me m’ndal kurrkush”, ka thënë Haziraj në video.
Ai dyshohet se të premten mbrëma, pas një mosmarrëveshjeje verbale, ka shtënë me armë zjarri ndaj Dardan Haxhijajt, rreth 34-vjeçar, duke e plagosur në pjesën e sipërme të këmbës së majtë.
Pas incidentit, Haziraj është larguar nga vendi i ngjarjes dhe aktualisht po kërkohet nga Policia e Kosovës.
Rasti është iniciuar si “Vrasje në tentativë”, me urdhër të Prokurorit të Shtetit.
https://vt.tiktok.com/ZS4p2P1KL
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata.
