Historiani dhe njohësi i zhvillimeve politike në rajonin e Ballkanit Perëndimor, Florian Bieber, ka komentuar vizitën e fundit të kancelarit gjerman Olaf Scholz në Serbi dhe marrëveshjen e arritur me presidentin serb, Aleksander Vuçiq, për litiumin. shkruan EWB, trasnmeton Gazeta Express.
Bieber thotë se vizita dhe arritja e një marrëveshje të tillë është shpërfillje e protestave, mashtrimit në zgjedhje dhe kapjes së shtetit që ka ndodhur në Serbi.
Sipas historianit Bieber, Scholz në mënyrë efektive po e varros integrimin në BE të Ballkanit Perëndimor, duke treguar se interesat ekonomike do të tejkalojnë sundimin e ligjit dhe të demokracisë.
“Në fakt, vizita e Scholz-it dhe marrëveshja shpërfill protestat, mashtrimin zgjedhor dhe kapjen e shtetit. Ai në mënyrë efektive varros integrimin në BE në Ballkanin Perëndimor, pasi tregon se interesat ekonomike të BE-së do të tejkalojnë sundimin e ligjit dhe demokracinë. Të besosh se qeveritë e tjera të Ballkanit Perëndimor nuk po e marrin parasysh do të ishte naive. Në fund, ata që dolën në rrugë në Serbi dhe në mbarë rajonin për të protestuar kundër shkatërrimit të natyrës nga investitorët e pamëshirshëm dhe shtetet bashkëpunëtore, do të ndihen më të braktisur. Dhe me mend çfarë? Ata nuk kanë gjasa t’i drejtohen BE-së për ndihmë ose mbështetje”, ka shkruar Bieber.
Bieber ndër të tjera ka shkruar se marrëveshja shpesh shihet edhe përmes lenteve mashtruese gjeopolitike, se duke e lidhur Serbinë me BE-në mund të duket se Serbia është larguar nga investitorët e tjerë, si Kina.
“Megjithatë, Vuçiq e ka përsosur lojën e tij gjeopolitike. Ndërsa retorika e brendshme e mediave dhe bashkëpunëtorëve të tij është nacionaliste dhe antiperëndimore, ai kërkon të maksimizojë ‘artin e marrëveshjes’ me sa më shumë aktorë globalë që të jetë e mundur, për të siguruar hapësirën e tij të lëvizjes. Kështu, regjimi ka kërkuar të sigurohet që të ketë sa më pak kushte dhe kufizime të jashtme”, potencon Bieber.
