Një aksident trafiku ka ndodhur të enjten rreth orës 13:10 në fshatin Baicë të Istogut, ku si pasojë kanë mbetur të lënduar katër persona.

Rasti është konfirmuar për Peja Information nga zëdhënësi i Policisë së Kosovës për Rajonin e Pejës, Driton Rugova, i cili bëri të ditur se në aksident janë përfshirë dy vetura.

“Sot rreth orës 13:10, Policia është njoftuar për një aksident trafiku i cili ka ndodhur në fshatin Baicë-Istog. Në këtë aksident ishin të involvuara dy vetura dhe si pasojë e aksidentit katër persona kanë pësuar lëndime trupore”, deklaroi Rugova.

Ai shtoi se personat e lënduar janë dërguar në Spitalin e Përgjithshëm në Pejë për trajtim mjekësor.

“Personat e lënduar janë dërguar në Spitalin Rajonal në Pejë për tretman mjekësor”, tha Rugova.

Policia e Kosovës është duke i hetuar rrethanat e aksidentit.